Latin text
Postquam Sāturnō tenebrōsa in Tartara missō
sub Iove mundus erat, subiīt argentea prōlēs, aurō dēterior, fulvō pretiōsior aere. Iuppiter antīquī contrāxit tempora vēris, perque hiemēs aestūsque et inaequālīs autumnōs et breve vēr spatiīs exēgit quattuor annum. Tum prīmum siccīs āēr fervōribus ūstus canduit et ventīs glaciēs adstrīcta pependit; tum prīmum subiēre domōs: domus-antra fuērunt et dēnsī fruticēs et vīnctae cortice virgae; sēmina tum prīmum longīs Cereālia sulcīs obruta sunt, pressīque iugō gemuēre iuvencī. Tertia post illam successit aēnea prōlēs, saevior ingeniīs et ad horrida prōmptior arma, nōn scelerāta tamen; dē dūrō est ultima ferrō. Prōtinus inrūpit vēnae peiōris in aevum omne nefās: fūgēre pudor vērumque fidēsque; in quōrum subiēre locum fraudēsque dolīque īnsidiaeque et vīs et amor scelerātus habendī. Vēla dabat ventīs nec adhūc bene nōverat illōs nāvita, quaeque diū steterant in montibus altīs, flūctibus ignōtīs īnsultāvēre carīnae, communemque prius ceu lūmina sōlis et aurās cautus humum longō signāvit līmite mēnsor. Nec tantum segetēs alimentaque dēbita dīvēs poscēbātur humus, sed itum est in vīscera terrae, quāsque recondiderat Stygiīsque admōverat umbrīs, effodiuntur opēs, inrītāmenta malōrum; iamque nocēns ferrum ferrōque nocentius aurum prōdierat: prōdit bellum, quod pugnat utrōque, sanguineāque manū crepitantia concutit arma. Vīvitur ex raptō; nōn hospēs ab hospite tūtus, nōn socer ā generō, frātrum quoque grātia rāra est; inminet exitiō vir coniugis, illa marītī; lūrida terribilēs mīscent aconīta novercae; fīlius ante diem patriōs inquīrit in annōs. Victa iacet pietās, et virgō caede madentīs, ultima caelestum, terrās Astraea relīquit. |
113
115 120 125 130 135 140 145 150 |